Udala auzotik (Arrasate) abiatuta, Udalatxeko gailurrera, eta, ondoren,
Besaidera eramango gaituen ibilbide zirkularra da segidan proposatzen dena.
Ibilbideak ez du zailtasun tekniko handirik, baina gailurrerako azken zatiak
arreta jartzea eskatzen du, ebakiren bat edo beste aurkituko baitugu. Euria edota
lainoa egiten badu, kontuz ibili behar da, gailurraren amaieran eta
jaitsieraren zati batean eremu karstikoa baitago, irristakorra bihur daitekeena
eta orientazioa ere asko zaildu dezakeena.
Arrasaten dagoen Udala auzotik abiatuko gara. Bertan, aparkaleku handi
bat eta Uxarte ostatua aurkituko ditugu. Errepidetik metro gutxi batzuk atzera
egin, eta eskuinera bi bidezidor ikusiko ditugu, gorantz, lehenengo bidezidorra
hartuko dugu. Ibilbidearen lehen zati honetan ia ez dugu seinalerik aurkituko;
beraz, adi egongo gara GPSari edo aurkitzen ditugun mugarriei kasu eginez.
Udalatxeko gailurrerainoko igoerak ez du ia etenik ematen, eta nahikoa
tente mantentzen da une oro. Pista-eremutik irten, eta, artadi-basoa atzean
utzi ondoren, lur belartsu eta karstikoan sartuko gara. Igoera gogorraren
ondoren, kanal belartsu batera igoko gara malda pixka bat leunduz. Ezkerrera,
Kurtzebarriko tontorra utzita, aurrez aurre ikusiko dugun leporantz jarraituko
dugu. Inguru honetan leize bat eta Jasokundearen santutegiaren hondakinak
daude. Dirudienez, duela mende batzuk monje eremutarrak bizi ziren santutegian,
XI. mendean.
Azken zatia ertz zabal batetik doa, eta ez du inolako zailtasunik.
Gailurrean gurutzea, postontzia eta orientazio-mahaia aurkituko ditugu. Euskal
mendietako ikuspegia oso zabala eta ederra izan arren, Anbototik Mugarraraino marrazten den
mendilerroren ikuspegia aparta da, ikusgarria oso.
Gailurrari bizkarra eman eta ertzetik jaisten jarraituko dugu altuera
galduz, eta, metro batzuk behera egin eta gero, Kobaundiko haitzulora iritsiko
gara. Mendizaleentzat oso
ezaguna da, haitzuloaren barrutik kanpora begiratzean Anbotoko ikuspegi panoramiko eta
dotorea erakusten du, mihise baten modura. Gainera, euskal mitologiarekin
lotura estua du, askok Mari jainkosaren bizilekuetako bat dela uste baitute.
Beherantz jarraituko dugu, Erdikoatxa eta Autxurrutxagane mendien
magala zeharkatuz. Lur belartsu eta karstiko batetik igaro eta gero, arte
kantauriarren eremua zeharkatuko dugu. Adi egon behar dugu mugarriz markatutako
bidezidor zuzenetik jarraitzeko; izan ere, lainoaren, zoru irristakorraren eta
lurraren ezaugarrien artean orientazioa zaildu egiten da. Azkenik, pista batera
irtengo gara, eta, putzu baten ondotik igaro eta gero, ibilbidea erosoagoa
egingo zaigu.
Aldapan behera bidegurutze batera jaitsiko gara, eta, Udala auzora doan
bidea itzulerako utzita, aurrera jarraituko dugu. Eskuineko pistatik aurrera
eginda, Yoshin Ogata japoniarrak egindako "Bizitza-iturria" izeneko
eskultura dagoen lepora ailegatuko gara. Eskultura abangoardista eta abstraktua
da. Segidan Besaideko gailurrera igoko gara, hildako mendizaleen monumentua
dagoen lekura. Besaideko monumentua mendian hildako mendizaleen
oroimenez eraikitako monumentua da, Araba, Bizkaia eta Gipuzkoa lurralde
historikoen arteko mugarrian kokatua. Oroitzapenaren Eguneko Jaia iraileko
hirugarren igandean ospatzen da, Besaidera igota. Euskal Mendizale Federazioak
bultzatuta eraiki zen Luis Pueyo arkitektoaren diseinuari jarraituz. Mont
Blancen hildako lau euskal mendizaleen tragediari erantzunez altxatu zuten.
Azken urteetan narriatuta egon ostean, 2023an erabat zaharberritu eta konpondu
zuten.
Aurreko bidegurutzera itzuli, eta, Besaideko iturrian trago bat hartu
eta gero, aurrera egingo dugu.
Aurrerago, Udalara iristeko bi aukera ematen dituen bidegurutzera
iritsiko gara: GR-121 edo PR-Gi 96. Bata
zein bestea aukeratuta, abiapuntura helduko gara, Udala auzora hain zuzen ere.
 |
| Udalatx Udala auzotik |
 |
| Basotik ateratzen |
 |
| Harkaiztian gora |
 |
| Kurtzebarriren magaletik pasatzen |
 |
| Mendi-leporantz |
 |
| Santutegiaren aurriak eta Anboto |
 |
| Udalatxeko gurutzea |
 |
| Udalatxeko tontorra |
 |
| Udalatxeko tontorrean Anboto gibelean |
 |
| Udalatxeko orientazio mahaia |
 |
| Udalatxeko buzoia |
 |
| Maldan behera kobaundirantz |
 |
| Maldan behera kobaundirantz |
 |
| Anboto Kobaunditik |
 |
| Putzua eta Anboto |
 |
| Anboto pinu artean |
 |
| Enbor arteko igaobidea |
 |
| Yoshin
Ogata japoniarrak egindako "Bizitza-iturria" izeneko eskultura |
 |
| Besaideko
gailurrean dagoen hildako mendizaleen monumentua |
 |
| Besaidetik Durangaldeko mendien ikuspegi zabala |
 |
| Besaideko iturria |
 |
| Ibilaldiaren bukaeran indarrak berreskuratzen |
